Мақолада  гиперболик типдаги бузиладиган иккинчи тур тенглама учун  бир силжишли   масала ўрганилган.

 Мақолада истеъмол қилинадиган ўрик мевасининг кимёвий таркиби, хоссалари ва табобатдаги аҳамияти ҳақида фикрлар билдирилган. 

Вермикулитга кислота билан ишлов берилди. Янги адсорбент, полиакрилонитрил/вермикулит композицияси синтез қилинди. Олинган сорбент хром  (VI), мис (II) ва никел (II) сувли эритмаларида адсорбсияси ўрганилди.

Туркистон совун ўти (маҳаллий номи “бих”) ёки Allochrusa gypsophiloides Ўрта Осиёда кенг тарқалган эндемик таркибида сапонин сақловчи ўсимликдир. Ультра самарадор суюқлик хроматография –электроспрей ионизацион масс-спектрометрияси (УССХ-ЭРИ-MС) A. Gypso-philoides илдизи таркибидаги моддаларни таҳлил қилишда қўлланилди. УССХ-ЭРИ-MС тадқиқоти натижасида ўсимликнинг метанолли экстрактида 2 та асосий тритерпен сапонини: гипсогенин (A) ва квиллаик кислота (B) ларнинг бисдесмозидлари аниқланди ва тавсифланди.

 Мақолада кротон альдегиди куб қолдиғининг таркиби тадқиқ қилиниб, унинг асосида полимеркомпозиция олиниши ёритилган.

Мақолада яшил “тоза” соғасидаги долзарб глобал тенденсиялар ва қайта тикланадиган энергия манбаларига ўтишнинг асосий шартлари таҳлил қилинган. Қирғизистон иқтисодиёти учун яшил “тоза” энергияга ўтишдан асосий мажбуриятлар ва имкониятлар кўриб чиқилиб, энергетика марказини яратиш бўйича тавсиялар берилган.

Мақолада янгиланаётган Ўзбекистонда тадбиркорлик фаолиятини мажмуавий бошқаришнинг моҳияти, йўналишлари, усуллари ва шакллари мисоллар, жадваллар орқали баён этилган

 Мақолада қадриятлар тизими, қадриятларнинг ижтимоий-фалсафий моҳияти, миллий ва умуминсоний қадриятларга нисбатан ёшларнинг позитив муносабатини такомиллаштириш, фуқаролик жамиятининг такомиллашуви жараёнида ёшларда аксиологик онгни шакллантиришнинг ижтимоий-педагогик зарурияти тадқиқ қилинган.

Оила давлат томонидан муҳофаза қилинар экан, унинг мустаҳкамлигини сақлаш, эр-хотин ўртасидаги ажралишлар сонини камайтириш, оилаларнинг бутунлиги ва барқарорлигини сақлаб қолиш борасидаги ташкилий-ҳуқуқий механизмларни кучайтириш, бу борада амалга оширилаётган ислоҳотлар самарадорлигини ошириш замон талабидир. Мазкур мақолада оила мустақиллигини сақлаб қолиш борасида оила қонунчилигини такомиллаштиришнинг айрим масалалари таҳлил этилган. Бунинг натижасида оила қонунчилигини такомиллаштириш бўйича айрим таклиф ва тавсиялар илгари сурилади.

Мақолада миллий ғоянинг бунёдкорлик моҳияти ва интегратив функцияси, Ўзбекистон тараққиётининг янги босқичида халқнинг ғоявий бирлашувини таъминлаш, унинг асосида миллий юксалиш ғоясини амалга оширишнинг ижтимоий-маънавий, сиёсий ва тарихий асослари тадқиқ қилинган. 

Мақолада  тадбиркорлик фаолияти тушунчаси, мазмун-моҳияти, унинг ижтимоий-маданий ва маънавий нуқтаи назардан таҳлил қилинган. Муаллиф муаммони ёритишда тадбиркорлик фаолияти, муносабатларининг трансформациясини анлашга ёрдам берувчи хорижий тадқиқотчи ва олимларнинг  илмий тадқиқотларига ижодий ёндашиб, ўз фикр-мулоҳазаларини билдирган.

Мақолада Ўзбекистонда илк давлат ва тижорат банкларнинг пайдо бўлиши, шаклланиши ҳамда ривожланиши,  замонавий бозор иқтисодиёти асосларининг вужудга келиши, ўзини оқламаган совет банк тизимининг муаммо ва зиддиятларга дуч келиши, мустақилликка эришилгандан сўнг миллий банк тизимининг янги моделига асос солиниши ва тизимнинг ривожланиши тадқиқ қилинган.

Мақола Сурхондарё воҳасида совет тузумига қарши қуролли ҳаракат тарихига бағишланган. Унда Қизил армияга қарши кураш раҳбарлари, уларнинг фаолияти, қуролли ҳаракат динамикаси таҳлил этилган. 
Шунингдек, қўрбошиларга қарши курашда совет ҳокимиятининг олиб борган сиёсати очиб берилган.

Мақолада тараққийпарвар ва миллат фидоийси Усмон Хўжа Пўлатхўжаевнинг Бухоро амирлигида таълимни замонавийлаштириш ва янги усул мактабларини ташкил этишдаги фаолияти манбалар таҳлили орқали очиб берилган. 

Мақолада “Кеча ва кундуз” романининг 1936 йилдаги илк нашри билан қайта нашрлари матнида кузатилувчи тафовутлар ҳақида сўз юритилади. Мавжуд тафовутлар муаллиф ижодий иродасига дахл қилиш деб баҳоланиб, бу қараш қиёсий таҳлил асосида далилланади. 

Мақолада “оламнинг манзараси” тушунчаси дунёқарашга боғлиқ эканлиги, бу икки тушунчага  маданият моҳиятидан келиб чиқиб аниқлик киритиш мумкинлиги тасдиқланади. “Оламнинг манзараси” тушунчаси фундаментал тушунчаларга оид бўлиб, инсон ва унинг ҳаётининг ўзига хослигини, олам билан алоқадорлигини, унинг оламда яшаш муҳим омилларини ифодалайди. Мақолада А.Ахматова ва М.Цветаева шеърий ижодида “сув”, “қуш”, “овоз” каби сўзлар мисолида қўлланган метафоралар оламнинг модели метафоризацияси сифатида талқин этилган.

 Мақолада Алишер Навоий ижодида муҳим ўрин тутган “Хамса”нинг “Ҳайрат ул-аброр” достонидаги Хожа образи ва унинг келиб чиқиш генезиси ўрганилган. Жумладан, образнинг Ибн Синонинг “Тайр” қиссаси ва Ғаззолийнинг “Кимёи саодат” асарларидаги илдизлари, Низомий Ганжавийнинг “Маҳзан ул-асрор”, Хусрав Деҳлавийнинг “Матлаъ ул-анвор” асарларидаги талқини, бу борада Навоийнинг ўзига хослиги мисоллар ёрдамида қиёслаб, ўрганилган.

Мақолада А.Қаҳҳорнинг “Сароб” романидаги деталлар  функционаллиги  ва динамиклиги  ҳақида  сўз юритилади.

Мақолада эганинг феълли ва отли гапларда лисоний фарқланиши,  эгаларнинг логик-грамматик, грамматик ва услубий-прагматик сингари турлари, шунингдек, эгасиз қӯлланиши мумкин бӯлмаган содда гаплар ҳақида маълумот берилади.

Мақола ўзбек халқ  шеваларининг илмий ва амалий тадқиқотлари назарияси ҳамда концепциясига бағишланган. Юқорида айтиб ўтилган ҳаракатлар назария ва концепцияни ҳамда унинг турларини мантиқий асослаш учун диахрон ва синхрон равишда илмий кузатишлар амалга оширилди. Улар "Ўзбек диалектологияси", "Ўзбек диалектал лексикографияси", "Тарихий диалектология" фанлари ривожи тўғрисида тушунча беради.

Мақолада  лисоний шахс масаласи, унинг нутқий имкониятлари ҳақида сўз юритилади. Дейксис категорияси  прагмалингвистиканинг асосий тадқиқ манбаи сифатида  эътироф этилади.

Мазкур мақолада Қ.Норқобил ҳикояларида характерлар руҳиятида психологизм масалалари тадқиқ этилган. Унда “Осмон остидаги сир” ва “Босинқираш” ҳикоялари ўрганилган.

Мақолада микроматн (суперсинтактик бутунлик – ССБ)ларнинг матннинг энг йирик бирлиги сифатидаги синтактик ва семантик белгиси – композицон қурилиши  ҳақида маълумот берилади. Шу билан бирга бундай бутунликлар композицион қисмлари – бошланма, фикр ривожи ва тугалланмаларнинг функционал-семантик таснифи тадқиқ этилган.

Мақолада муаллиф футуризм адабиётдаги мунозарали авангард тенденцияларидан бири эканлиги, футуристларнинг поэтик қарашлари билан боғлиқ тил ва адабиётдаги янги ҳодисалар, уларнинг назарий платформаси сифатида очиб беради.

Мақолада назарий тафаккур билан идрокий  билим ҳосил қилиниши асослаб берилган бўлиб, сўзшакл ва унинг тилдаги қўлланилиши ва нутқда ишлатилиши, унинг вазифалари аниқ кўрсатиб берилган. Шу жиҳатдан маъноси ҳамда товуш томони таҳлилга  тортилган бўлиб, эмпирик билим назарий хулосалар учун материал бўлиб хизмат қилиши асослаб берилган.

Бугунги кунда Бродскийнинг шахсияти, шеърияти сингари, қарама-қарши ҳис-туйғуларни келтириб чиқаради. Бродский лирикаси мураккаб синтаксиси ва жанрлар хилма-хиллиги билан ажралиб туради.
Бродский лирикасининг энг муҳим хусусиятларидан бири хилма-хил шеърий ва ноанъанавий шаклларга мурожаат қилиш, шеърият учун янги шаклларни кашф этиш ва анъанавий шаклларни мослаштириш кабилардир. Ушбу турли жанрларнинг шаклланишида шоир ва тил, шоир ва бадиий воқеликнинг ўзаро таъсирининг имкониятлари, умуман шеърий тизим ривожланишининг ўзига хос хусусиятлари, айниқса, яққол намоён бўлади.

Мақолада кино номларини лингвистик аспектда ўрганишнинг аҳамиятли жиҳатлари хусусида сўз боради. Фильмоним (кино номлари) кинонинг муҳим таркибий қисми бўлиб, номлаш, ахборот бериш, аниқлаш, олдиндан сезиш, диққатни жалб қилиш, томошага ундаш ҳамда информацион вазифани бажариши айтиб ўтилган. Шунингдек, фильм номларига саводлилик, қисқалик, ихчамлик, асар мазмун-моҳиятини тўлиқ қамраб олиш, номлаш, асар мазмуни тўғрисида тасаввур уйғотиш, ўзига ром қилиш, фильмни томоша қилишга ундаш, ахборот бериш, яхлит маъно ифодалаш, образлилик, мажозийлик каби хусусиятлар мавжудлиги таъкидланган.

Мақолада ҳозирги кунда Ўзбекистон олий педагогик таълим соҳасини ривожлантириш юзасидан амалга оширилаётган ислоҳотлар мазмуни ҳақида сўз юритилади.  Олий педагогик таълим тизимини ислоҳ қилишда хорижий таълим тажрибасидан фойдаланиш борасида ҳам фикрлар билдирилган. Бу борадаги халқаро ҳамкорликка алоҳида эътибор қаратилган.

Мақолада олимпиадаларга тайёрланиш жараёнида масала ечишнинг  турлича усулда амалга оширилиши, унда ҳаётий тажрибага асосланиб ўқитишга, тушунчалар, қоидалар ва уларни кузатишлар, машқ ва мисоллар асосида кўргазмали чиқарилиш усуллари, амаллар ва уларнинг хоссаларини баён этишда уларнинг қўлланилиши, матнли ва сюжетли машқ, мисолларни ечишда ўқувчиларда фикрлаш кўникмаларини шакллантириш, алгебраик ва геометрик тушунчалар, бошқа амаллар билан ўзаро алоқадорлигидан  фойдаланиш ёритилган.

Мақолада ядросида Гаусснинг гипергеометрик функцияси иштирок этган интеграл тенгламаларни интегро-дифференциал операторлар ва уларнинг баъзи композициялари ёрдамида ечиш кўрсатилган.

Мақолада t топологияга нисбатан алгебранинг топологик йордан алгебра эканлиги, яъни ўзгарувчилари бўйича барча алгебраик амалларнинг  узлуксиз эканлиги исботланган.

Мақолада ўзбек тили луғат тизимининг ривожида семантик тараққиётига доир маълумотлар берилган. Бунда тилимизнинг турли даврларига оид ёзма ёдгорликлар лексикаси ва ҳозирги ўзбек адабий тилининг луғат таркиби қиёсланган.

Бизнинг тадқиқот ишимизда мотор мойларида нефть ва нефть маҳсулотларининг миқдорий таркиби ва уларнинг % даги массавий улушини аниқлаш методикаси келтирилган. Таҳлилий метод асосида нефтнинг мотор мойидаги миқдорий таҳлили амалга оширилган. Ушбу таҳлилий метод  ГС бўйича 2710 ёки 3403 субпозицияда таснифланадиган мотор мойидаги нефть мойларининг миқдорини аниқлаш учун қўлланилади.

Мақолада болаларга хос  оғзаки ва ёзма матнларнинг яратилишида лингвистик гештальт ҳодисасининг матн  идрокига хос когнитив ҳолатлари таҳлил этилади.

 Мақолада умумий ўрта таълим мактабларида кимё ўқитишнинг бугунги ҳолати юзасидан маълумотлар, кимё ва кимё саноатининг инсоннинг кундалик ҳаётидаги роли, шунингдек, мақсади ўқувчиларнинг кимё асосларини ўрганишга қизиқишларини ошириш бўлган илмий тадқиқот натижалари келтирилган

Мақолада ўзлашма сўзлар, арабча ўзлашмалар ва уларнинг ўзбек тили луғат тизимидаги ўрни, Навоийнинг сўз ўзлаштириш имкониятлари, шоир асарларида қўлланган арабча ўзлашмалар  статистикаси ҳақида  фикр юритилади.

Мақолада Ўзбекистон Президенти Шавкат Мирзиёев томонидан берилган топшириқлар, Вазирлар Маҳкамасининг анор етиштириш бўйича чиқарган қарорлари, Ўзбекистонда анор етиштиришни ривожлантириш истиқболлари ҳамда анорнинг касалликка, қурғоқчиликка чидамли ва серҳосил янги навларини  яратиш,  анор кўчатзорлари ва боғларини кўпайтириш бўйича қисқача маълумотлар берилган.

Мақолада тиббий терминлар ҳам сон жиҳатидан, ҳам сифат жиҳатидан жиддий лингвистик таҳлилга муҳтожлиги, уларнинг структур-семантик нуқтаи назардан тадқиқи нафақат замонавий терминологиянинг долзарб йўналишларидан, балки ҳозирги замон терминологиясининг кечиктириб бўлмас масалаларидан бири бўлиб  қолганлиги мухтасар баён қилинган.

Илмий адабиётлар таҳлили герман тилларида адабиётшунослик терминларининг бир хил ва бир текис ўрганилмаганлигини кўрсатади. Тадқиқот объекти қилиб олган адабиётшунослик терминлари славян, роман ва герман тилларида мутлақо ўрганилмаганлигини кўриш мумкин. Шунинг учун фалсафа, маданият ва маънавият, этика, эстетика, дин ва тасаввуф, тилшунослик ва, айниқса, адабиётшунослик терминларини ўрганиш долзарб масалалардан ҳисобланади. Ушбу мақолада адабиётшунослик терминларининг герман тиллари мисолида ўрганилганлик даражаси ва аҳамияти тўғрисида тўхталиб,  Крис Болдикнинг “The Concise Oxford Dictionary of Literary Terms” луғатидаги мураккаб таркибли адабиётшунослик терминлари таҳлилга тортилган.

Мақолада кундалик ҳаётда одам соғлиғига зарар етказувчи ксенобиотиклар турлари ва улар етказадиган зарар ҳамда улар вужудга келтирадиган заҳарларга карши курашадиган организмнинг ҳимоя механизмлари, айрим ксенобиотикларни ўрганиш усуллари  ва  организмдаги 2 та ҳимоявий тўсиқ тури келтирилган.

Мақолада шу кунгача ишлатилган систематик сўз бойлигини ўрганиш ва унинг келиб чиқиши билан боғлиқ масалалар муҳокама қилинади.

Мақолада мушукларнинг ҳамма ички аъзоларида текинхўрлик қилиб яшовчи Sarcocystistenella Railliet,1886 нинг мушук танасида қандай ривожланишини аниқлаш мақсадида ўтказилган тажрибанинг натижалари келтирилган.

Мақолада мулоқотнинг новербал каналлари ва турлари, уларнинг мулоқот жараёнида тутган ўрни, функциялари ҳақида гап боради. Шунингдек, новербал мулоқотнинг турли маданиятлардаги кўринишлари тасвирланади.

Мақолада фавқулодда вазиятларда фуқаро муҳофазаси фанини ўқитишдаги хорижий тажрибалар ва ушбу мамлакатларда фуқаро муҳофазаси ишлари қандай ташкил этилганлиги ҳақида маълумотлар берилган.

Мақола дунё тилшунослари томонидан узоқ йиллардан буён тортишувларга сабаб бўлаётган мавзулардан бири фраземанинг тил бирлиги мақоми хусусида бўлиб, унда бир гуруҳ олимлар фразема компоненти сифатида сўзлар ўзларининг сўзлик мақомини йўқотиши ёки фраземалар шаклланишида иштирок этган сўз-компонентлар ўзларининг сифатларини сақлаб қолишини тасдиқловчи тилшуносларнинг илмий-назарий фикрлари таҳлилга тортилган ва мисоллар келтирилган. Ҳар бир тилнинг фразеологик фондида семантик нуқтаи назардан шаклланган турли иборалар мавжудлиги, янгича йўналиш вакилларининг нуқтаи назарлари келтирилди.

Мақола гендер тенгликка бағишланган бўлиб, унда, хусусан, Ўзбекистонда хотин-қизлар ижтимоий ҳимояси, уларнинг жамият иқтисодий, сиёсий, ижтимоий, маданий ҳаётида фаол иштирокларини таъминлаш юзасидан глобаллашув жараёнида олиб борилаётган ва бажарилиши зарур бўлган масалалар таҳлил қилинган.

Давлат тилида иш юритувчилар учун ўзига хос ибораларнинг ишлатилиши тушунишни таъминлайди. Mақолада  тил ўрганувчилар учун қўлланилиши мумкин бўлган топшириқлар тавсия қилинади.

Мақолада Амир Темур томонидан Мовароуннаҳрнинг шимоли-шарқий чегараларига кўчириб келтирилган қора тоторлар ва ироқликларнинг 1405-1407 йилларда ўз юртларига кўчиши, ушбу жараённинг уч босқичда амалга ошганлиги ҳамда уларнинг кўчишига таъсир қилган омиллар тарихий манбалар асосида таҳлил қилинган. 

Ҳозирда биз маълумотларни ўрганиш, ўқиш, тинглаш, кўриш ва қайта ишлаш учун реал вақт режимида ишловчи турли хил мобил дастурлардан фойдаланмоқдамиз. Google томонидан ишлаб чиқарилган Firebase реал вақт NoSql маълумотлар базаси хавфсиз, тезкор ва ўзининг реал вақтда хабардор қилиш тизимига эга. Бундан ташқари, Firebase ўзининг булут тизимига эга ва Flutterда яратилаётган дастурлар билан осон ва мукаммал бирлашади. Биз ушбу маълумотлар базасидан ўзимиз яратаётган Flutter кроссплатформалик мижоз-сервер технологиясига асосланган реал вақт тизимларимизда фойдаланишимиз мумкин.

Мақолада Афғонистоннинг географик жойлашуви, унинг Марказий Осиёдаги геосиёсий ўрни, Афғонистоннинг Марказий Осиёдаги муҳим геостратегик нуқтада жойлашганлиги, XIX аср охири ‒ XX аср бошларида Афғонистоннинг мустақил ташқи сиёсий фаолият доирасидаги ҳаракатлари, Англиянинг Афғонистон ички ишларига аралашуви, Англия ва Россия ўртасидаги дипломатик муносабатларга доир тарихий фактлар таҳлили, Англия ва Россия ўртасидаги келишувларнинг натижалари ва аҳамияти ёритилади.

Мақолада Фарғона водийсининг биринчи шайбоний ҳокими масаласи тарихий манбалар ва адабиётлар асосида тадқиқ этилган.

Москва остоналарида жасорат кўрсатган, кўплаб қаҳрамонлар орасида Тўмарисдек довюрак Зебо Ғаниева номи кўпчиликка нотанишдек туюлади. Мақолада ҳақиқий ўзбек аёлининг мардонавор кураши, унинг қизиқ тақдири, урушдаги жасорати тўғрисида сўз боради.

Мақолада Абдулла Шер ижоди ҳақида сўз юритилиб, унинг ижодидаги Ватанга ва миллатимизга бўлган муҳаббат ғоялари тараннум этилади.

Мақолада бугунги кунда бутун дунё аҳолисини таҳликага солаётан касаллик балосини иложи борича осонроқ ва енгилроқ енгиб ўтиш, Ер шари бўйича тарқалган мафкуравий бузғунчиликлардан ёшларимизни асраб қолишда Алишер Навоийнинг пурмаъно фикрларидан фойдаланиш ҳақида мулоҳаза юритилади. 
Муаллифлар инсон саломатлигига таъсир этувчи энг кучли воситалардан бири – бу, сўз эканлигига атрофлича тўхталадилар.

Мақолада зукко бахши Раҳматулла Юсуф ўғли томонидан куйланган “Тоҳир ва Зуҳра” достони  таъсирида  Қора бахши Умиров яратган яна бир достон хусусида сўз юритилади. Бахши    ўз иқтидори билан ижодий ёндашиб, достоннинг яна бир вариантини яратишга муваффақ бўлди.

Мақолада тахаллуслар асосида ҳосил қилинадиган таносиб, иттифоқ, ийҳом, тажнис каби шеърий санъатлар ва радиф, нидо каби шеърий унсурлар ҳамда услубий воситалар таҳлили берилган.

Мақолада Ойбекнинг “Машраб” шеърида Машраб образи талқинидаги ўзига хосликлар ёритилган. Шеърий санъатлар, тасвирий воситалар, бадиий тафсиллардан фойдаланишдаги шоир маҳорати тадқиқ этилган. ХХ аср ўзбек адабиётида “Машраб” шеърининг ўрни ва аҳамияти кўрсатиб берилган.