Ҳар доим олам ва одам билан боғлиқ мавзулар ва муаммолар мазмун-моҳияти, кўлами ҳамда таъсирчанлиги жиҳатидан умуминсоний миқёсга эга бўлган. Олам ва одам, абадийлик ва умрнинг ўткинчилиги, оламнинг чексизлиги ва ҳаётнинг мазмуни каби масалалар ҳозиргача ўз аҳамиятини йўқотмаган. Инсон бор экан, у ўзи ва ўзлигини англар экан, бундай азалий масалалар ва уларнинг турлича талқинлари абадий сақланиб қолаверади.